Landbruksteljing 2010

Abstract

Landbruksteljing 2010 blei gjennomført som ei fullteljing av Statistisk sentralbyrå, Seksjon for primærnæringsstatistikk. Teljinga var organisert som eit eige prosjekt ved seksjonen i perioden 2008-2012. Fullstendige teljingar har blitt gjennomført om lag kvart tiande år sidan 1907. Landbruksteljinga 2010 omfatta følgjande:  Ei kombinert skjema- og registerbasert teljing av 46 624 aktive jordbruksbedrifter inkludert hagebruk  Ei registerbasert teljing av 189 000 landbrukseigedomar, utan omsyn til om det var jordbruksdrift eller ikkje på eigedomen Teljinga skulle dekke både nasjonale og internasjonale statistikkbehov. Noreg er ifølgje EØS-avtala forplikta til å rapportere tal for jordbruksbedrifter til EUs statistikkbyrå Eurostat. Rapporteringa blei gjennomført innan tidsfristen sett av Eurostat. Felles krav til data, inklusive ei ny inndeling av jordbruksbedrifter etter driftsform, betyr at det kan publiserast samanliknbar statistikk for alle EU- og EØS-land. Tabellane i kapittel 9 inneheld slik statistikk. I den skjemabaserte teljinga av aktive jordbruksbedrifter var det oppgåveplikt for alle som dreiv minst 5 dekar jordbruksareal per 31. juli 2010. I tillegg var det fastsett supplerande krav for å fange opp einingar med husdyrhald eller hagebruk over visse omfang. Den skjemabaserte datainnsamlinga omfatta tre ulike skjema:  Hovudskjema for alle opplysningspliktige jordbruksbedrifter  Hagebruksskjema for einingar med hagebruk over definerte minstegrenser  Tilleggsskjema om jordbruksareal og husdyr for einingar som ikkje søkte produksjonstilskot i jordbruket Av dei i alt 46 624 opplysningspliktige jordbruksbedriftene var det 3 036 som dreiv hagebruk over dei definerte minstegrensene. Den viktigaste administrative datakjelda for jordbruksbedriftene var søknad om produksjonstilskot i jordbruket. Tilskotsregisteret inneheld detaljerte opplysningar om bruken av jordbruksarealet og tal dyr for dei ulike husdyrslaga. 855 einingar søkte ikkje produksjonstilskot og måtte fylle ut tilleggsskjemaet. Om lag 24 prosent av oppgåvegivarane nytta web-portalen Altinn ved innsending av skjema. For første gongen ble det publisert tal frå Meirverdiavgiftsregisteret for samla omsetnad på jordbruksbedriftene. Statistikken for landbrukseigedomar bygger på ein kombinasjon av data frå Landbruksregisteret, Matrikkelen og digitale arealressurskart. Bruk av kartbaserte verktøy (GIS) sto sentralt i to utviklingsprosjekt for landbrukseigedomane, eit arealprosjekt og eit prosjekt om arrondering av jordbruksarealet. Arealprosjektet ga tre viktige resultat: Ein korrigert og forbetra populasjon av landbrukseigedomar, tal for eigedomane sitt totale areal og dette arealet delt inn i 23 ulike arealtypar og areal for 9 ulike typar næringsbygg. Rapporten omfattar totalt 107 tabellar med resultat frå Landbruksteljing 2010. Gjennomføring av landbruksteljinga er dokumentert i publikasjonen Notater 2013/27 Landbrukstelling 2010. Dokumentasjon.